காரசாரமாக கடப்பா பூண்டு பொடி இப்படி செய்தால் இட்லி, தோசை, சாதம் எது கூட வேண்டுமானாலும் சாப்பிடலாம்!

Ingredients

• 12 காய்ந்தமிளகாய்
• 20 பல் பூண்டு
• 1 கப் உளுந்து
• 1 கப் கடலைப்பருப்பு
• 1 ஸ்பூன் தனியா விதைகள்
• 1 ஸ்பூன் சீரகம்
• 1 ஸ்பூன் மிளகு
• 1/4 கப் கொப்பரை தேங்காய் துருவல்
• 1/2 ஸ்பூன் பெருங்காயதூள்
• எண்ணெய் (தேவையான அளவு)
• உப்பு (தேவையான அளவு)

Method

1. முதலில் தோலோடு உள்ள பூண்டை எடுத்து இஞ்சிக்கல்லில் நசுக்கி எடுத்துக்கொள்ள வேண்டும்.பிறகு அடுப்பில் ஒரு கடாயை வைத்து எண்ணெய் ஊற்றி நசுக்கி வைத்துள்ள பூண்டை சேர்த்து நன்றாக பொன்னிறமாக வறுத்து எடுத்துக் கொள்ள வேண்டும்.

2. பூண்டுநன்றாக வறுபட்டால் தான் இந்த பொடியை ஒரு மாதம் வரைக்கும் வைத்து பயன்படுத்தி கொள்ளலாம். பூண்டை நன்றாக வறுத்தெடுத்து ஆற வைத்து கொள்ளவேண்டும்.

3. பிறகு அதே கடாயில் உளுந்து, கடலைப்பருப்பு சேர்த்து நன்றாக பொன்னிறமாக வறுத்து எடுத்துக் கொள்ள வேண்டும்.

4. பிறகு அதில் தனியா விதைகள், சீரகம், மிளகு சேர்த்து நன்றாக வறுத்து எடுத்து ஆற வைத்துக் கொள்ளவேண்டும். பின்பு அதில் துருவிய கொப்பரை தேங்காய் சேர்த்து நன்றாக வறுத்து எடுத்து வைத்துக் கொள்ள வேண்டும்.

5. பிறகு அதே கடாயில் எண்ணெய் ஊற்றி காய்ந்த மிளகாயை நன்றாக வறுத்து எடுத்து வைத்துக்கொள்ள வேண்டும். வறுத்தெடுத்த பொருட்கள் முழுவது ஆறிய பிறகு ஒரு மிக்ஸி ஜாரில் காய்ந்த மிளகாய் முதலில் சேர்த்து அரைக்க வேண்டும்.

6. அப்பொழுது மிளகாய் ஒன்று இரண்டாகத்தான் அரைந்திருக்கும். பிறகு அதில் பூண்டைத் தவிர மற்ற வறுத்த பொருட்களை எல்லாம் சேர்த்து பொடியாக அரைத்துக் கொள்ள வேண்டும்.

7. பிறகு அதில் வறுத்து வைத்துள்ள பூண்டு, உப்பு, பெருங்காயத்தூள் சேர்த்து நன்றாக பொடித்து எடுத்து வைத்துக் கொண்டால் இட்லி, தோசை, சாதத்தோடு சாப்பிடுவதற்கு சூப்பரான கடப்பா ஸ்டைல் பூண்டு பொடி தயார்.