பீட்ரூட் பூமிக்கு அடியில் விளையும் சத்துமிக்க ஒரு காய் . பீட்ருட் ஃப்ரை ஒரு நல்ல பக்க உணவாக அமைகிறது. இந்த பீட்ருட் ஃப்ரை சாதத்திலும் பிசைந்து சாப்பிடலாம் , மிகவும் அருமையான ருசியுடன் இருக்கும். இது எளிதான, ஆரோக்கியமான செய்முறையாகும். ஹீமோகுளோபின் அளவை அதிகரிக்க தினமும் உணவில் பீட் ரூட்டை சேர்த்துக்கொள்வது அவசியம். பீட்ரூட்டில் இரும்பு சத்து அதிகம் உள்ளது. அதோடு பீட்ரூட்டில் உள்ள சத்துக்கள் மூலம் நமது உடலில் உள்ள ரத்த சிவப்பணுக்களின் எண்ணிக்கை அதிகரிக்கும்.
வீட்டில் உள்ள மற்றவர்களும் வெறுத்து ஒதுக்கும் ஒரு காய்கறி என்றால் அது பீட்ரூட் தான். இதனை பலரும் விரும்பி சுவைப்பது கிடையாது. ஆனால் இதில் உடம்பிற்கு தேவையான பல ஆரோக்கியமான விஷயங்கள் இருக்கின்றன. இதனை வாரத்திற்கு ஒரு முறையாவது உணவுடன் சேர்த்துக் கொள்ள வேண்டும். குழந்தைகள் காய்கறி சாப்பிடாமல் இருப்பதற்க்கே இவ்வளவு யோசிக்கும் தாய்மார்களுக்காக , இப்படி ஊட்டச்சத்து அதிகம் நிறைந்த இந்த பீட்ரூட்டை எவ்வாறு செய்தால் வீட்டில் உள்ளவர்கள் விருப்பமாக சாப்பிடுவார்களோ அது போல சுவையாக செய்வது எப்படி என்று தான் இந்த பதிவின் மூலம் தெரிந்து கொள்ளப் போகின்றோம்..
பீட்ருட் ஃப்ரை | Beetroot Fry Recipe In Tamil
Equipment
- 1 கடாய்
தேவையான பொருட்கள்
- 1/4 கிலோ பீட்ருட்
- 1 பெரிய வெங்காயம்
- 1 தேக்கரண்டி கடுகு
- உப்பு தேவைக்கு
- 1 கொத்து கறிவேப்பிலை
- 1 தேக்கரண்டி எண்ணெய்
பொடிக்கதேவையான பொருட்கள்:
- 4 தேக்கரண்டி எள்
- 5 வரமிளகாய்
- 6 பல் பூண்டு
- 1 தேக்கரண்டி சீரகம்
செய்முறை
- பீட்ருட் மற்றும் வெங்காயத்தை பொடியாக நறுக்கவும். மிளகாயை லேசாக வறுக்கவும். சீரகம், எள், பூண்டு சேர்த்து மிக்ஸியில் பொடிக்கவும்.
- வாணலியில் எண்ணெய் ஊற்றி கடுகு, கறிவேப்பிலை தாளித்து வெங்காயம், சேர்த்து வதக்கவும்.
- வெங்காயம் வதக்கியவற்றுடன் பீட்ருட், உப்பு சேர்த்து தேவைக்கு தண்ணீர் விட்டு வேக வைக்கவும்.
- பீட்ருட்நன்கு வெந்ததும் பொடியை சேர்த்து நன்கு சுருள வதக்கி இறக்கவும்.. சுவையான பீட்ருட் ஃப்ரை தயார் .
