இனிப்பு என்றால் யாருக்கு தான் பிடிக்காது, அதுவும் மிகவும் வித்தியாசமான ஸ்வீட்களை ருசிக்கவே பலரும் விரும்புவர். பூசணிக்காய் பயன்படுத்தி பூசணிக்காய் கூட்டு, பூசணிக்காய் குழம்பு, என்று பல வகையான ரெசிபிகளை செய்யலாம். அந்த வகையில் இன்று நாம் மஞ்சள் பூசணிக்காய் அல்வா செய்வது எப்படி என்று காண உள்ளோம். இது செய்வது மிகவும் சுலபம் 25 முதல் 30 நிமிடங்களில் செய்யலாம். இந்தியாவில் பல விதமான அல்வா செய்யப்படுகிறது. பாதாம் அல்வா, முந்திரி அல்வா, கேரட் அல்வா, வட இந்தியாவில் மிகவும் பிரபலம். தமிழகத்தில் அனைவரும் அறிந்தது திருநெல்வேலி அல்வா. இதுதவிர மஞ்சள் பூசணிக்காய் அல்வா திருமணம் போன்ற விசேஷங்களில் செய்யப்படும்.
அரசாணிக்காய், மஞ்சள் பூசணிக்காய், பரங்கிக்காய் என்று விதவிதமான பெயர்களில் அழைக்கப்படும் இந்த பூசணிக்காயில் நிறையவே சத்துக்கள் உண்டு. குறிப்பாக பெண்களுக்கு வரக்கூடிய பல பிரச்சனைகளை தடுக்கும். பூசணிக்காயில் நார்ச்சத்து அதிகமாக இருப்பதால் உடல் எடையை குறைக்க மிகவும் உதவும். புண்களை ஆற்ற, தழும்புகளை காணாமல் போகச் செய்யவும் பூசணிக்காய் பயன்படும். இந்த பூசணிக்காயை இப்படி அல்வா செஞ்சி பாருங்க, ஆரோக்கியம் மட்டுமல்ல அட்டகாசமான சுவையையும் கொடுக்கும். பூசணிக்காயை நாம் எப்பொழுதும் குழம்பு அல்லது கூட்டாக செய்து தான் சாப்பிட்டிருப்போம் ஆனால் பூசணிக்காயில் அல்வா செய்யலாம் என்று எத்தனை பேருக்கு தெரியும், அந்த வகையில் இந்த தொகுப்பில் பூசணிக்காயில் அல்வா எப்படி செய்யலாம் என்று பார்க்கலாம் வாங்க.
மஞ்சள் பூசணிக்காய் அல்வா | Yellow Pumpkin Halwa Recipe In Tamil
Equipment
- 1 பவுள்
- 1 கடாய்
தேவையான பொருட்கள்
- 1/4 பூசணிக்காய்
- 2 கப் சர்க்கரை
- 1/4 கப் நெய்
- 2 ஏலக்காய்
- குங்குமப் பூ தேவையான அளவு
- பாதாம், முந்திரி தேவையான அளவு
செய்முறை
- முதலில் பூசணிக்காயை கழுவி விட்டு பின் தோலை நீக்கி விட்டு துருவி வைத்துக் கொள்ளவும்.
- ஒரு கடாயை அடுப்பில் வைத்து நெய் சேர்த்து காய்ந்ததும் அதில் முந்திரி பருப்பு, பாதாம் சேர்த்து பொரித்து எடுத்து வைத்துக் கொள்ளவும்.
- ஒரு கடாயை அடுப்பில் வைத்து சிறிதளவு நெய் விட்டு துருவிய பூசணிக்காயை சேர்த்து 10 நிமிடங்கள் வரை நன்கு வதக்கவும்.
- அதன்பின் அதனுடன் சக்கரை, ஏலக்காய், குங்குமப்பூ சேர்த்து நன்கு கலந்து மிதமான தீயில் 15 -20 நிமிடங்கள் வரை வதக்கவும். பின் அதில் மீண்டும் நெய் சேர்த்து கலந்து மீண்டும் 10 நிமிடங்கள் வரை நன்கு வதக்கவும்.
- பின் நாம் எடுத்து வைத்துள்ள பாதாம், முந்திரியை சேர்த்து கலந்து அடுப்பை அணைத்து விடவும். அவ்வளவுதான் சுவையான மஞ்சள் பூசணிக்காய் அல்வா தயார்.
Nutrition
இதனையும் படியுங்கள் : காரசாரமான ருசியில் ஒரு தரம் பூசணிக்காய் கார குழம்பு இப்படி செய்து பாருங்க! சாதத்துடன் சாப்பிட அவ்வளவு அருமையாக இருக்கும்!
